早上0915我地係港內線碼頭集合搭0930慢船去長洲，係船到大家講得興高采烈，好快長洲碼頭已經出現係我地眼前。首先去釣魚舖買蝦蝦粉粉，當準備去食早餐既時候。『哎呀﹗我件救生衣呢？』我終於記得因為掛住講所以漏低左係船到。我立即飛奔去碼頭，好左水手大哥將佢放左係碼頭既辦公室等人認領。如果唔係都唔知點去釣，真係唔該晒~~~~~﹗
|
活動
|
長 洲 試 新 位 |
|
日期
|
2004年10月17日 |
|
時間
|
0930 - 2000 |
|
地點
|
長洲 |
|
釣友
|
小星、Harry、阿麟、貓魚 |
| 2004年10月17日，正當外礁熱釣細鱗既時侯。我、小星、Harry同阿麟幾位大漁磯位心血來潮想走去港內試釣，大家一致決定去長洲一帶。
早上0915我地係港內線碼頭集合搭0930慢船去長洲，係船到大家講得興高采烈，好快長洲碼頭已經出現係我地眼前。首先去釣魚舖買蝦蝦粉粉，當準備去食早餐既時候。『哎呀﹗我件救生衣呢？』我終於記得因為掛住講所以漏低左係船到。我立即飛奔去碼頭，好左水手大哥將佢放左係碼頭既辦公室等人認領。如果唔係都唔知點去釣，真係唔該晒~~~~~﹗ |
|
 |
都唔知個餐叫早餐定午餐好……食完都差唔多12點，買埋人餌就叫艇出發﹗去到原本想上既位見到上晒浪，冇計唯有轉位喇~~~係艇到兜兜轉轉用左成粒幾鐘先上到避風位釣。 上到釣場，發覺個位好正﹗漲退都有流。開竿既時候Harry就話既然個位咁細就開我支撈磯一齊釣喇﹗佢好旺咖﹗攪掂晒後正式釣魚，『Harry，飛機流呀~~』我講。Harry：『唔駛擔心，搵到避流位就有魚﹗』可惜避流位就有，不過有好多泥猛將我地重重包圍。由腳邊到成三竿位置都係泥猛﹗冇辦法喇，唯有繼續釣。大約兩點到，就見到相距不遠既阿麟中魚，一條大約斤頭既黑沙上水。原來阿麟那邊都係泥猛密襲，係咁既情況下都釣到黑沙真係大鎮軍心。可惜後來都避唔開泥猛，期間轉過好多釣法、釣組都冇用……。 |
| 大約釣到5點Harry同我相繼投降，食晚餐先。Harry就食排骨飯，而我就煮通粉食﹔阿麟就繼續努力同泥猛周旋。食飽抖一抖，見轉緊流又天開始黑就準備第二回合，而阿麟就尾圍用膳。我同Harry都係搵返個避流位釣，我係腳邊車輪手打左廿幾下誘餌，跟手就將釣組放出。漁訊好快出現，不過食得好龜毛。浮波沈左少少又升返上黎（好我忍你），跟住又沈少少……輕輕帶一帶竿頭。『卡、卡』立即揚竿作合。中喇﹗道力好重好蠻咁飛去我左手邊既石底，心想以為牛屎，死頂唔放將竿帶去右邊唔俾佢摷石。收到一手叫：『Harry撈磯﹗』條魚跟手轉為向我腳下面衝，打八字又收多一手，成功控住條魚。Harry黎到我仲同佢講估係牛屎，點知銀光一反魚又向下衝……我話：『好大條黑沙呀!?』。頂多兩下條魚開始冇力，收多兩手條魚升水。『白仔呀﹗』Harry叫道。最後成功入網，Harry：『黃腳黎咖﹗好大條黃腳呀﹗』『真係好大條黃腳呀﹗我都未釣過咁大條呀﹗』我立即係腳邊狂谷誘餌叫Harry走埋黎一齊釣。 |  |
 |
阿麟一路食麵一路睇晒成個過程，立即三扒兩勃開工繼續釣﹗可惜一片寂靜，最後Harry搵第二個位釣。釣到差唔多七點半既時候依然冇咩起色，我見誘餌都打晒就收竿洗野。洗洗下既時侯聽到Harry大叫『撈磯呀~~』。我立即走去拎撈磯，去到已經見到Harry成功將條魚收到上水面，我撈左幾下都撈唔到，幾驚條魚走左呀﹗話晒我撈魚都好叻咖嘛﹗條魚終於入網，係一條磅頭牛屎。就係咁今日一人一條收工!! |
| 當我地洗好野，坐左一陣艇家就出現收礁喇﹗係艇到打電話俾小星叫佢準備走人，原來佢個位入黑個時有d上浪，一早收好竿等返屋企。去到碼頭剛好夾到船返香港。係船到即刻拎戰利品出黎來個大合照﹗大家都話條黃腳有兩斤重。最後決定拎條魚去開會食﹗返到屋企即刻睇下條魚有幾大先，足足38cm。後來去到釣魚舖同條魚磅重，兩斤半黃腳一條。真係好開心可以有條新既紀錄魚喇~~~ |  |
|
文: 貓魚
|