活動
 捉虱中年
日期
 2003年09月24日
時間
 0800 - 1700
地點
 西貢
釣友
 世南、阿榮、伍大福、貓魚、FK


幾位參加了9月21日舉行的水上活動嘉年華既團友，為了親睹虱目一面。世南、FK、貓魚、五大福和阿榮決定於9月24日自組『五個虱望的中年』再去虱樂園。

當日0800西頁小巴站集合，食完早餐買完糧餉就call艇出發。0900正式開工，FK、五大福和阿榮揀左上船位﹔而我和世南行去左手面磯位作釣。我地釣左一陣未見虱目蹤影，來來去去都係只有魚手指（巡鱗）攪攪，於是我決定同魚手指玩遊戲，釣了幾條之後世南忍唔住喇。過了一會，連FK也過來加入戰陣﹗


~1045，突然發現阿榮那邊出現兩匹巨物﹗可惜唔係虱目，而係兩個攞胆既潛水佬。佢地一路沿阿榮腳邊個面掃過離，我便大聲叫佢地唔好游咁近，可惜佢地聽完都係我行我素﹔就連誘餌攻擊都唔怕。游到我地面前世南亦忍唔住關心一下佢地既家人，問候一番。成個海咁大，咁多內塘都係要死係人地面前攪，真冇品﹗大約半小時零漁訊後，手指魚終於返離。我同FK又繼續釣手指魚，而世南就將目標放返係虱目。我同FK係粒鐘唔駛已經釣到六十幾條，於是我見收夠籌就釣返虱目。


其間一直都冇虱目出現，正當我同世南吹緊水既時候，『虱目呀﹗』我突然大叫﹗『食左我粒飽呀~~~』說時遲那時快，虱目已經一口食左。世南同FK立即收好釣組方便我玩魚。那時我既GTR已經箭沉水裡，杯既主絲一直出。我只是用手指禁絲抽而冇?杯抽，虱目知道中伏即時加速，我鬆手俾佢走﹔約走左1/3杯絲後見佢收油後我就?杯同佢死過。

我ZOOM竿利用竿既回彈力去消耗佢更多既體力，同佢玩消耗戰。其間收收放放，到收到約20m既時候佢又再一次爆發『摧毀性出絲』，LB絞既把手跟空氣碰撞發出〝服服〞聲。一瞬間佢已經游出10幾m絲，走到阿榮同五大福個面。怕虱目會纏到佢地見立即出力一泵，虱目表演跳水。咁跳法好易出事，都係用軟攻同佢慢慢玩。佢收手我又收絲……之後有三次將佢收到腳邊，可是佢一回到氣又爆返出去，常常攪到我得返1/3貨仔同佢玩。經過一輪攻守之下，佢已經冇EN出『摧毀性出絲』喇，而我都所如無幾……持續~12、3分鐘之後佢既體力終於透支，FK幫我同佢埋單，5斤多虱目上水。唉……好攰呀﹗



在搏魚期間以為佢咁掃埸法實嚇走晒d虱目喇﹗但係反而吸引到更多虱目靠近，居然見到有兩條虱目跟隨中伏個條係到游。做好善後世南同FK又再出擊。好快機會降臨係世南身上，可惜佢一抽就斷絲收埸。之後輪到FK喇﹗一抽虱目立即出絕招 - 『摧毀性出絲』向住大海飛去，那時FK既籌碼得番1/3左右。好左FK用既係2號竿，制魚方面比較得心應手。我立即取出DC拍低搏魚過程，FK那條虱目都唔睇得少，收收放放都要玩成十多分鐘先可以成功上到水。那個撈磯框完來鬆左，不過好在冇甩到﹗FK解好魚後準備落生扣既時候，發現我中的那一條已經做左矢吹丈油盡燈枯。嗱嗱聲收返上離放係誘餌袋到放血先﹗『頂唔頂得緊呀？』我問FK。『都要休息吓先喇……』


跟著又靜返，FK話打誘餌個時見到有大尾魷噴墨。世南即核唔知係邊到攞左隻姣蝦出離做野，可惜未能運用美色成功勾引大尾魷。後來我就走去上船位搵補給，順便叫埋伍大福同阿榮一齊去釣先﹗返回釣點我就將d方飽剪粒粒，世南就講解虱目釣法，而FK就繼續休息。噫﹗點解個誘餌袋多左條虱目既？完來世南見到FK都虱目都變左做矢吹丈，做準備俾d蟹仔襲擊添﹗


冇左虱目出現，FK釣返手指魚，世南、阿榮同伍大福努力釣虱目﹔而我就繼續行行企企休息休息。之後走左隻大頭艇埋離，我話：『唔係又嘉年華呀？』。好在佢地都係釣魚既﹗差唔多就四點，我見都冇咩聲氣又開返支竿釣埋一份，後來我同世南既釣組打左結，唯有收上離解喇﹗點知解解下阿榮突然話見到虱目，跟手有條虱目衝上離食阿榮釣組粒飽，可惜完來粒飽一早就甩左中空寶。後來又有條虱目食世南之前打結整甩左個粒飽，虱目群又出現喇﹗解好之後我同世南立即上餌拋竿，虱目又出現喇。今次又食我粒飽呀﹗『中喇﹗中喇﹗』我叫道。其他人立即收好釣組，我又用相同方法抽魚。


〝服服……服服服〞又一次『摧毀性出絲』，收左佢兩手佢又爆過，出絲比之前我中既重快重狠﹗條魚回氣之際我就交俾世南，我做攝影師。條魚又再一次『摧毀性出絲』，世南嘗試泵魚，唔得﹗虱目又係到跳水﹗其間驚動到大頭艇既釣友注意，通通走晒過離睇。虱目又一次『摧毀性出絲』，世南努力頂魚個時見佢額頭霧汗、面有難色……『冇時間喇﹗快d喇﹗部DC冇memory喇﹗』我催促世南『哈哈﹗』眼見世南玩左成5分鐘都冇d起色。『5、4、3、2、1……冇喇﹗』DC宣佈飽晒，個頭冇得拍世南就咁泵甩左條魚。收工﹗之後再冇虱目出現﹗
而我地都差唔多時候收礁，咁就完成左今次既『五個虱望的中年』。

 

大漁相集
大漁報告
文: 貓魚