|
活動
|
快快樂樂找屎去 |
|
日期
|
2003年02月23日（星期日） |
|
時間
|
0700 - 1730 |
|
地點
|
長洲 |
|
釣友
|
小星、貓魚、細南 |
|
其實今次活動係大漁新友磯釣日既Part II，不過可能由於我小星、貓魚同細南冇"o麥"吸引力，所以冇新釣友肯同我地去，於是只有我地三個大漁磯友去釣。 係廿三號既早上，我、貓魚同細南都準時到達中環往長洲既碼頭集合，三條磯友一齊搭0700開出既快船往長洲進發。0735左右到達長洲，再施施然去買誘餌粉及取已預先退好冰既南極蝦，安排好誘餌後又依照計劃一樣–飲早茶﹗飲吓、吹吓，唔經唔覺吹左成粒鐘先肯走。哈……冇計啦，三個磯友一個墟，吹水吹到唔"扌未"咀。埋單後慢慢買人餌同冰塊。但到預備好晒所有野後先知到有問題，原來三個都冇帶車仔，個個都幾蝦幾粉，加加埋埋十幾廿kg野。唔通要行？好甘喎…… “唉，年紀大，機器壞。阿星快d去叫艇啦﹗”細南叫。 於是我地放棄步兵計劃轉坐大眼雞去搵位釣。由於大嶼山果面上星期同Rico、Patrick仔釣過，蕉到驚，所以今次目標都放返係長洲本島，試下有冇得釣。 |
 |
 |
沿途搵位時都見到好多大陸既朋友“攞胆”，又有好多長洲既朋友落簾。“唉，冇計﹗求其搵個位上啦﹗唔好再浪費時間喇。”細南又叫。走左幾個位都唔合心水，但最後都搵到個位可以三個人釣喇。快快手、齊幫手，上礁後大家都係忙著攪誘餌。點解要快手？因為我地慢吞吞，攪到上礁時都成九點幾，唔快手d開竿，到中午就冇得玩喇﹗（怕老泥大咬嘛﹗）但一山還有一山高，一手還有一手快﹗真係勢估唔到原來我地經已俾人mark住喇﹗係我地上礁後不到十五分鐘，已經有個漁民係我地右手面100m左右遠處，開始落簾過離，完全係食硬我地三個……D誘餌。大家見到後手腳又放慢左喇，因為咁近落網，咩都冇啦，完全冇得玩﹗ 一如所料，上半場三個都掛零，就算大家打左半袋誘餌都冇反應，唯一安慰既就只得魚仔食餌，重叫做有生物先啦﹗到半場休息喇，三個又走埋一齊吹水，我仲吹到訓著添﹗哈哈…… |
|
大家休息夠後，又重新再開竿釣喇﹗正午過後潮水開始退，我地三個雖然做左網中人，但都希望努力D釣吓，睇吓有冇奇蹟出現，細南首先開竿再釣，我就再新開誘餌，貓魚就換釣組。正係各有各努力既時候，細南竟然吹口哨叫我同貓魚喎﹗一睇之下，um……做野﹗分頭行事，我衝去攞撈磯，貓魚去搵相機。但係條斤半牛屎唔生性，唔肯交功課，相機都未搵到就俾細南支1號STACIA攪掂左喇，前後都唔洗廿秒。 “唉，估唔到第一次拍住細南釣，就要同佢撈魚，唔通我今日要做佢漁僮？”我嘆氣，但係冇所謂啦﹗今次都算叫做有魚釣到，唔洗俾人笑嘛﹗仲要係落網都釣到，細南應得既﹗影完相、扣好魚後，大家又再釣過喇。由於我同貓魚所釣既位置，形勢唔係太好，所以經相議後一齊爬過去第二面釣，離開一下當旺既細南，費事俾佢食住，又要同佢撈魚﹗ |
 |
|
我同貓魚好辛苦咁爬左過另一面開始再釣，呢面既形勢完全唔同，好有五行石feel﹗初初我釣左，貓魚右，流由左至右行，但釣釣吓我鉤石，要重新再綁過釣組，慢慢綁好後走到貓魚右邊釣。哈……今次輪到貓魚中……地球，又要再綁過釣組，同時面前一竿左右有一隻釣艇漂過，大家四目相投，無話可說。 “釣艇釣到咁埋，仲有得玩？”“唔緊要，只要佢唔開副車，都仲有得釣。”我說。 “中呀……哈哈﹗”我一抽竿條魚就開turbo喇。“咦，呢條有兩斤喎﹗”當條魚第一次開尾時我叫。“嘩……呢條過兩斤呀﹗”條魚又走第二次時我又叫。 頭一、二輪我都冇放到LB，因為希望靠支竿既彈性泵佢上水。 “成功喇﹗見魚影喇﹗”“嘩……好大餅呀﹗”我暗叫。 條魚見撈磯時又再走多一轉，但最終都係敵唔過我……支08 Precede SP條腰，乖乖入網。 “嘩……好重﹗”真係有三斤幾喎﹗嘿嘿……我呢個人肉電子磅都幾準，條魚起碼三斤半。係咁既位都釣到咁大條，我同貓魚都有D跌眼鏡，但最開心係支竿真係好正﹗完全冇壓力，08 GAMA真係名不虛傳。 |
|
|
|
當我拿著條魚，跌跌碰碰咁爬返去俾細南落魚扣時，細南都俾我嚇左一跳，“衰仔星﹗洗唔洗到玩到咁大呀？”細南說。扣好魚後放返落海又去釣過﹗ 返到位時貓魚已經係到做緊野喇﹗我又快快手綁鉤再離過，條1.5號子冇花到可以再用番。再釣既期間分別又有兩隻艇係外面收網，但可惜呢個上魚位又係零漁訊，所以我同貓魚又爬返去早上既位繼續再釣。雖然有人收網，但見仍有流，所以貓魚就好努力釣喇，冇辦法啦﹗咁大壓力，三個人釣，兩個都有魚，但常言道，壓力越大越易出錯。忽然間，貓魚支名礁06滿弓喎﹗咦？睇佢都玩得好柔喎﹗慢慢收，慢慢頂……但係突然支竿彈直、浮波上飛。斷左？係喎﹗唔係嘛，咁快？係呀…… 就咁樣，貓魚連全日唯一一口都失埋，斷魚後不久，流水都退定喇，時間又差唔多，大家都收拾好、影相、放血、雪魚。大眼雞亦準時到達收礁﹗我地三個再係長洲食完個下午茶後，就搭1730大船回中環，結束今次『快快樂樂找屎去』既活動喇﹗ |
|
文: 小星
|
