鴉洲人人有份

活動	鴉洲人人有份
日期	2002年02月09日
時間	0400-1900
地點	大小鴉洲
釣友	大漁磯社：龍珠Ray、貓魚、小星亡命磯釣：Ken、阿牛、Danny、Danny朋友、文、南華、師父祥

好開心又可以再一次同亡命網咁多位師兄弟一齊去釣魚，其實今次我地大漁三個純屬搭枱性質，事先都冇咩宣揚呢次既行動。當然釣到既就梗係要同大定報告下啦﹗

係今次既釣行裡面，時間係最大既敵人。唔係話時間太短，而係太長喇﹗足足釣成十五個鐘，都幾甘（冇魚既話）﹗由於係釣兩段流既關係，我準備左五蝦四粉為今次既誘餌。哈哈……希望冇魚釣時都可以玩下打誘餌啦﹗

今次又要再一次唔該Danny哥為我地大家訂蝦，唔洗大定揪得咁辛苦。早上0400，Danny同朋友係筲箕灣落船，沿途"護送"南極蝦到三家村，係三家村有我同阿Ray落船，大隊係觀塘一碼頭落船。係觀塘完成分蝦後正式開始呢個十五小時鴉洲之旅。原來觀塘去鴉洲真係咁遠，風平浪靜都要四十分鐘先可以到達。首先証礁既係Danny、Danny朋友同阿文，跟手就係Ken哥同牛哥，第三係我、南華同師父祥，最後係貓魚同阿Ray。由於冇X位可以上既關係，貓魚同阿Ray就上左我地既右手面。

上到礁時天仍未光，大家都第一時間準備誘餌。第一個開竿既係師父祥，天未光就放蛇（青虫）去咬魚。佢話睇下有冇"爆光魚"喎﹗由於係第一次上呢個位釣，所以我就唔心急開竿住，慢慢咬個飽、飲杯咖啡等天光。終於都天光喇﹗亦由於時間既關係，我用左最快既時間咬左半磅麵包，仲開埋支竿添﹗快呢。

上礁後差不多個多小時先天光，而我地三個亦已就位啦。潮流由左至右行、中速。釣位分別係我流頭、南華中間、師父祥流尾。天光後大家都好努力打誘餌，但過左差不多一個鐘都冇反應，點解呢？唔通附近太多人釣，d魚散晒？定係今日就咁……呢？好在﹗呢個迷團跟手好快就俾我破解左喇﹗一下明顯既魚訊將未瞌醒既我叫醒，試左一兩下就慢沉喇。好﹗同你死過﹗一揪竿都幾好力，唔錯。我用左十幾秒就KO左佢喇，黑沙公一條斤十左右啦，好在冇爆漿~~~支08Precede SP都幾好力﹗當係我沾沾自喜去解魚既時候發現……

吓？我個位有人釣緊既？哦……師長祥﹗冇緊要，師父祥釣遠投GTR，我釣浮波中距離，冇影響，有魚齊齊釣嘛。我釣既標點係中距離半水，而師父祥就釣出少少既出水石，佢話想釣牛屎喎﹗所以睇下有冇牛屎衝出黎食餌。就係佢過左黎唔夠十口餌既時候，案件就發生左喇﹗忽然間我聽到一連串既走Drag聲，『X？唔係有人中煙仔呀』當我回身一望師父祥既時候，只見佢支BBX-SP 1.5滿弓泵魚，『嘩﹗成個GTR Tester呀﹗』（佢著住件GTR救生衣嘛﹗）有走Drag聲就因為個新BBX-XT LB絞放LB作怪，同條魚頂左十幾秒鐘後，因為條魚睇落都唔係幾好力水，而最近鴉洲都有白立橫行，所以同南華都估係白立，size仲唔少小呢﹗但師父祥就好冷靜咁講：『唔係白立，係牛屎黎咖，佢一直都拍住個底游既。』呢個問題就係兩竿水外有答案喇，因為條牛屎俾支BB-X SP泵到半途昇水，但收到腳邊又玩左一輪先肯入網。牛屎一條，差不多三斤，偷魚成功﹗哈哈……師父祥解魚後又走返去流尾釣喇。又剩返我一個釣，唉……俾人偷左條魚都幾Hurt﹗有計啦，GTR我又唔曉，唯有繼續打誘餌，keep住d未散既魚啦﹗大約四十分鐘過去，太陽越來越猛，『有冇攪錯呀，天文台又話落雨既？而家搵舊雲都難呀﹗』南華仍然好努力咁玩無限，但釣極都係狗公仔。唔通呢個Round玩完，要等落流個Round？打個電話問下環境先。『Ken哥仔，有冇境呀？』『唉，斤頭黑沙一條，好龜呀﹗』『貓魚哥，點呀？又打龜呀？』『唔係呀，有條斤十左右黑沙公呀﹗』『你又知係公？』『係呀，佢上到水時見到我興奮得濟向我顏射lor﹗』『哈哈……咁都得？』

問完戰況後又繼續努力喇，見仲有少少流，調深少少釣下先﹗深度係竿半水，持續打誘餌後漁訊又黎啦。嘿嘿……又係我中？冇錯，又中魚喇，斤頭黑沙一條，條魚完全冇得還手，十秒都唔洗就“著陸”喇﹗兩條黑沙都好小心食餌，都係鉤咀邊，有兩條魚責箱後，人都有d想休息下，飲杯野先﹗師父祥又同一時間一齊休息，食個杯麵，係我同師父祥吹水期間，空氣中忽然傳來“啪”聲。『吓﹗唔係炸竿呀？d聲咁熟既？貓魚支鱗海炸兩節都冇咁響喎﹗』

大家一睇，只見到南華好無奈咁揸住支中通EX默哀，小星：『南華，你……』南華：『我……』師父祥：『吓？你……』，係一輪你你我我之後，南華先肯講出真相，南華：『我真係見粒無限緩沉，我咪揪下佢lor，點知佢要夾硬黎喎，我已經放左兩手俾佢咖喇﹗佢仲唔夠，仲要我俾佢。我唔肯，所以……就……』哦……原來係對斷左，仲要係3叮號主線喎，勁呀﹗連半場休息既我同師父祥都唔敢休息喇，快快手睇下仲有冇先﹗

又一個鐘後，大家先知條怪物個導航有問題，先游左入呢個內灣。流亦慢慢停左落黎，海上面同空中既交通亦越來越繁忙。中午期間先有香港特區政府既直昇機練習，跟手又有“下岡”既朋友，最後仲加插圍網仔表演添﹗真係目不暇給，大開眼界，最衰就係冇人“攞膽”同白海豚睇。如果唔係就仲正喇﹗

等下又一個鐘，等下又一個鐘，直昇機飛走喇，圍網仔圍完喇，“下岡”又下完喇，遠處既人又收晒礁喇。一切回復平靜後，大家都重新撈好誘餌，等下午五點既落流尾埸。南華佢誓要報斷魚之仇，打衡誘餌，我同師父祥都有魚，所以慢慢黎唔洗急。係尾場我只想釣多條牛屎先收工，而師父祥就想釣黑沙，無他既，上半場釣唔到，恨丫嘛﹗落流閎潮流好怪，潮水唔肯靠岸，大家都摸緊究竟立魚會係邊層同幾遠食餌呢？唔……好快師父祥就話俾大家聽啦喇，佢用GTR遠投中到，原來d立一直都唔肯埋，係外面食，呢條係黑沙，有斤幾重。再冇耐條流終於都壓埋黎喇﹗係重誘餌猛攻之下，南華第二個中魚，條魚都幾好力，玩到南華好開心，最後師父祥幫手撈魚，又係黑沙，不過呢條大d，有兩斤幾，起完黑沙後師父祥又話想釣下白立，希望有啦。

冇耐，跟手到我中魚，嘿嘿……係偷返師父祥條魚，係佢腳邊中，連飛波果下佢都睇到。仲叫我揪添﹗嘻嘻……又一條牛屎，細少少、只有二斤半，最後師父祥都得償所願，又用GTR中到條白立，但可惜師父祥有意，白立無心。最後都係分手收場，師父祥：『冇計，1.5子線冇得還手，諗住釣下魚仔咋嘛，點知真係食埋黎。『哈哈……最後亦再冇漁訊喇，因為大定既誘餌都打完。

洗好餌袋，收好竿。船亦已經黎到收礁喇。收齊礁後大家一齊返回觀塘碼頭影相。結果係：Ken哥3條斤頭立（三黑沙．一牛屎）、阿牛2條（差不多同size既三斤黑沙）、師父祥兩條（兩斤十三牛屎、斤頭黑沙）、南華一條（兩斤多黑沙）、貓魚兩條（斤十黑沙、磅頭白立）、阿Ray一條（磅頭黑沙）、我三條（兩斤半牛屎、斤十及斤頭黑沙）。收獲都幾好，總共15條立魚，算係見得下人啦。如果唔係師父祥同南華失手，同有一組錯過流水，總尾數一定過二十條，希望下次大家再交手既時候會更加好玩啦﹗

大漁相集

大漁報告

文: 小星