今天早上大家在香港仔吃過早餐後,便立刻到釣具店買誘餌;補給後便出發到蒲台磯釣,由於今天的風浪很大,我們只能選一些避風位作釣.

登礁後,大家分開三個位作釣,而阿賢是首先開竿,當他勾出第一口餌時,浮波即時箭沉,他一揚竿,只見他手持磯竿扭曲成C字,由於他沒有帶撈箕,我只好連忙跑過去替他撈魚,啊…原來斤半牛牛,正當我收回撈箕時"卡"一聲…撈箕破裂,宣報報銷!!!

快樂時光

當阿賢的牛牛上水後,大家都同聲說{今日唔駛打龜啦!}大約15分鐘後,從我身後突然傳來一聲{胡強…睇野啦!}我立刻回頭一望,只見阿賢對我點頭一笑,然後他大力一揚,又見到支竿立時變左個U字,今次條魚堅好多,要玩一陣先上水,原來又係牛牛,重1斤14兩,不久,阿輝放流又中,條魚玩到腳邊剿完又剿,終於上水,又係牛牛,今次仲大條成2斤!中午12時,阿賢的三元浮波又迅沉,他一揚竿~10兩絲立上水!

逃出龜咒

戰至這時,只剩下我和Jess打龜!然而東北風越吹越勁,雨也下起來,天氣驟降,突然,Jess揚起了她手持的磯竿,成支2號磯竿飲水(好似呢期魚訊 p.40張相咁),頂了又頂,最後1斤10牛牛上水!眼見人人有魚釣,我只好悄悄走過來偷釣,谷左好耐誘餌都無魚訊,只好去醫下肚,正所謂D魚唔食,我都要食咖!突然,阿賢話{等我執位去下巴石個邊,釣番條毛先!}我心唸~有病就睇醫生啦!點知,唔夠廿分鐘,見到他突然揚竿,條魚都幾好力係腳邊剿黎剿去,嘩!!!上水啦…shit!!!竟然係磅頭口太黑毛!唉…今次真係技不如人,無話可說,飲恨呀!大概1430左右,我只好狠狠的把誘餌轟出去,希望D牛牛會聽到我"絕望的呼叫"流水開始轉變起來,由右流向左,我的浮波不見了,我一抽竿,中啦!玩了一陣,條魚都幾好力,上水啦,係一斤半黑沙媽媽,終於破解龜咒啦!之後很久都無魚訊,1600左右,阿賢的三元浮波又高速箭沉,玩左幾手,上水啦…10兩牛牛被捕!!!

總結

今天釣果很好, 人人有魚中. 阿賢5匹(3牛牛 1絲立 1黑毛) 阿輝1匹(1牛牛) Jess 1匹(1牛牛) 胡強1匹(1黑沙)

另外尚有更多相片在待晒中, 晒完後將刊登在"大漁相集"中