一號風球大尾督

原本打算出蚊洲釣煙仔幽面既活動。因為起風關係而改為到長沙，再因為艇家既意見而改為去大細鴉。再再因為黃蜂襲港，整個計劃廷至晚上十一時許正式取消。取消之後，心有不甘既我和健健便相約去釣淡水，地點直指大尾督魚塘。由於唔駛約艇，所以我和健健全冇時間觀念咁訓夠食夠先出發。入到大埔已經十一點幾，之後去買淡水魚粉，跟住健健又話要揀支新手竿喎。攪埋飲飲食食去到大尾督已經點幾鐘。

一去到已經見到有大約十個患上釣魚綜合症侯群既釣手係到釣魚，由於我地台釣唔多在行，所以請教了魚塘既教練提供專業意見。教練話初階既人最好就走去初級池釣，貪個到d魚多，密口又易釣。我地快手快腳走過去，開好魚餌粉同竿就ACTION……見到其他人中魚連連，我地就開始用僅有既台釣知識加一d自己既幻想去釣。總算都叫做釣到，不過唔夠人地釣得多。釣了一會，教練走過睇下我地釣，之後佢就教了我地好多台釣既基本技巧，經過教練既指導之後，發覺真係易釣左好多……我地既手風越來越順，而黃蜂(風雨)亦都越來越大。

我地唯有釣一陣避一陣，可惜風雨越來越大，我地已經全身濕透，於是便決定提早收竿走人。今次初釣都有唔錯既收獲﹔有鯉魚、鰂魚、鯇魚……而且用手竿釣手感真係一流。

文: 貓魚